فداك يا صدام!


Image

يا زلمة شو هاليوم هادا.. صحيت وأنا بحكي يا صباح يا عليم يا فتاح ويا كريم إلا وأنا بلاقي الدنيا مولعة.. هدول العراقية ضريونا.. آه يا عمي ضربونا ومسحو بكرامتنا الأرض.. أنا فار دمي وطار عقلي وأنا بحضر الفيديو وبشوف حراس السفارة العراقية بضربو بالأردنية.. يا عمي الأردني ما بنضرب.. كرامته فوق كل شي.. بعدين ما تقلي هادا كان أردني أو فلسطيني، أنا مخي طار وبطلت أفرق.. وبعدين ما لحقت أهدي حالي وأشرب فنجان هالقهوة إلا وأنا بقرأ كلام عبدالهادي راجي المجالي على الفيسبوك وبرجه ضغط دمي برتفع للسما.. يعني كيف هذا العراقي بصف سيارته بنص الكازية وبسب على البلد اللي حاويته.. يعني بطل في عندنا كرامة؟ العراقي بسبنا من جهة والسوري من جهة والمصري من جهة؟ شو يعني الأردني صار ممسحة؟ أنا صرت ممسحة؟ معقول؟ أنا مو ممسحة، والله اللي بحكي معي كلمة لأدعس في بطنه. صح أنا مديري في الشغل بمسح في الأرض كل يوم عشني تيس بس برضو مديري أردني مثلي مثله، بطلعله، بعدين أنا بكون غلطان مرات معلش… المهم، أنا بعد ما قرأت مقال عبدالهادي، بطلت أشوف الضو.. وصرت أشوف العراقي سوري قصدي يهودي.. وحملت حالي وقلت يا ولد الك خمستعشر سنة مو عارف تطرد السفير الإسرائيلي فليش ما تحاول تطرد السفير العرافي وترد كرامة الشعب الأردني؟ ممكن يكون أسهل، بعدين ما في فرق اسرائيلي، فلسطيني، عراقي، كلهم واحد، المهم أعبر عن غضبي وأسترجع كرامتي. المهم نزلت ولميت صحابي وحملنا هالحجار ونزلنا رشق بهالسفارة.. حسينا حالنا زي أطفال الإنتفاضة.. يعني ننتفض ليش ما ننتفض.. هاي كرامة الأردني وفدا صدام حسين..بس أخ إجا الدرك ونزل فينا غاز مسيل للدموع وضرب.. وانا بلشت اركض وهربت للبيت.. طبعا بعد ما وجهنا رسالة للعراق انه كرامة الأردني خط أحمر.. وبكر انشالله رح افرجيكم تياستي، يعني انا مخي خزق، ولما يفور دمي ما بعرف امي.. وجيشنا جيش الوطن.. 

Advertisements